നിയമസഭാ തിരഞ്ഞെടുപ്പ്: ഇലക്ട്രോണിക് മീഡിയ പരസ്യങ്ങൾക്ക് മുൻകൂർ അനുമതി നിർബന്ധം

 

വരാനിരിക്കുന്ന നിയമസഭാ തിരഞ്ഞെടുപ്പിനോടനുബന്ധിച്ച് ഇലക്ട്രോണിക് മാധ്യമങ്ങളിലൂടെ നൽകുന്ന തിരഞ്ഞെടുപ്പ് പരസ്യങ്ങൾക്ക് മീഡിയ സർട്ടിഫിക്കേഷൻ ആൻഡ് മോണിറ്ററിങ് കമ്മിറ്റിയുടെ (MCMC) മുൻകൂർ അംഗീകാരം വാങ്ങണം.

സ്ഥാനാർത്ഥികളും വ്യക്തികളും നൽകുന്ന പരസ്യങ്ങൾക്ക് ജില്ലാതല സമിതിയുടെയും, രാഷ്ട്രീയ പാർട്ടികളും സംഘടനകളും സംസ്ഥാനതലത്തിൽ നൽകുന്ന പരസ്യങ്ങൾക്ക് മുഖ്യ തിരഞ്ഞെടുപ്പ് ഓഫീസറുടെ കീഴിലുള്ള സമിതിയുടെയും അനുമതിയാണ് വേണ്ടത്.

ജില്ലാ കളക്ടർ വിനയ് ഗോയൽ ചെയർമാനായും ജില്ലാ ഇൻഫർമേഷൻ ഓഫീസർ കെ. മുഹമ്മദ് മെമ്പർ സെക്രട്ടറിയായും മലപ്പുറത്ത് ജില്ലാതല സമിതി പ്രവർത്തനം ആരംഭിച്ചു.

എവിടെയൊക്കെ സർട്ടിഫിക്കേഷൻ വേണം?

താഴെ പറയുന്ന മാധ്യമങ്ങളിലൂടെ നൽകുന്ന പരസ്യങ്ങൾക്ക് പ്രീ-സർട്ടിഫിക്കേഷൻ അനിവാര്യമാണ്:

ടി.വി ചാനലുകൾ, ലോക്കൽ കേബിൾ ചാനലുകൾ.

റേഡിയോ, എഫ്.എം.

സോഷ്യൽ മീഡിയ, ഇന്റർനെറ്റ്, ഇ-പേപ്പർ.

സിനിമാ തിയേറ്ററുകൾ.

പൊതുസ്ഥലങ്ങളിലെ ഓഡിയോ-വിഷ്വൽ ഡിസ്‌പ്ലേ.

ബൾക്ക് എസ്.എം.എസ്, വോയ്‌സ് മെസേജ്.

അപേക്ഷ സമർപ്പിക്കേണ്ട വിധം:

നിർദിഷ്ട ഫോമിലുള്ള അപേക്ഷയോടൊപ്പം പരസ്യത്തിന്റെ ഉള്ളടക്കം അടങ്ങിയ പെൻഡ്രൈവ് (രണ്ട് പകർപ്പുകൾ), സാക്ഷ്യപ്പെടുത്തിയ ട്രാൻസ്‌ക്രിപ്റ്റ് എന്നിവ സിവിൽ സ്റ്റേഷൻ ബി-3 ബ്ലോക്കിലെ ജില്ലാ ഇൻഫർമേഷൻ ഓഫീസ്/മീഡിയ മോണിറ്ററിങ് സെല്ലിൽ സമർപ്പിക്കണം.

സമയപരിധി: പരസ്യം നൽകുന്നതിന് ചുരുങ്ങിയത് 3 ദിവസം മുൻപെങ്കിലും അപേക്ഷ നൽകണം.

അച്ചടി മാധ്യമങ്ങൾ: തിരഞ്ഞെടുപ്പ് ദിവസമായ ഏപ്രിൽ 9-നും തലേദിവസമായ ഏപ്രിൽ 8-നും പത്രങ്ങളിൽ നൽകുന്ന പരസ്യങ്ങൾക്കും മുൻകൂർ അനുമതി വേണം.

ജില്ലാ കളക്ടർ വിനയ് ഗോയലിന്റെ അധ്യക്ഷതയിൽ ചേർന്ന എം.സി.എം.സി യോഗത്തിലാണ് ഈ തീരുമാനങ്ങൾ അറിയിച്ചത്.