വിദ്യാർത്ഥികളുടെ സ്വപ്നങ്ങൾക്ക് ചിറകേകാൻ – “ഇഗ്നൈറ്റ് മൈൻഡ്” പദ്ധതിക്ക് ജില്ലാകളക്ടറുടെ ഉദ്ഘാടനം

ചെമ്മാട്: മലപ്പുറം ചെമ്മാട് നാഷണൽ ഇംഗ്ലീഷ് മീഡിയം ഹയർ സെക്കൻഡറി സ്കൂളിലെ വിദ്യാർത്ഥികൾ “ഇഗ്നൈറ്റ് മൈൻഡ്” എന്ന പദ്ധതിയുടെ ഭാഗമായി മലപ്പുറം ജില്ലാ കളക്ടർ ശ്രീ. വി.ആർ. വിനോദ് IAS മായി കുടിക്കാഴ്ച നടത്തി. പഠനകാലത്ത് തന്നെ വിദ്യാർത്ഥികളുടെ കഴിവുകളും അഭിരുചികളും തിരിച്ചറിഞ്ഞ്, അവരുടെ സ്വപ്നങ്ങൾ യാഥാർഥ്യമാക്കാൻ പ്രാപ്തരാക്കുക എന്ന ലക്ഷ്യത്തോടെ സ്കൂളിലെ ഇംഗ്ലീഷ് ക്ലബാണ് ഈ ശ്രദ്ധേയമായ പദ്ധതിയ്ക്ക് മേൽനോട്ടം വഹിക്കുന്നത്.

സിവിൽ സർവീസ് രംഗത്തേക്ക് കടക്കാനുള്ള ആഗ്രഹവുമായി എത്തിയ വിദ്യാർത്ഥികളോട് ജില്ലാ കളക്ടർ  ആശയവിനിമയം നടത്തി. തന്റെ ജീവിതാനുഭവങ്ങളും സിവിൽ സർവീസ് യാത്രയിലെ വെല്ലുവിളികളും പങ്കുവെച്ച കളക്ടർ, വിദ്യാർത്ഥികളെ ഉന്നത ലക്ഷ്യങ്ങൾ നിശ്ചയിച്ച് ആത്മവിശ്വാസത്തോടെ മുന്നോട്ട് പോകാൻ പ്രേരിപ്പിച്ചു.

“സ്വപ്നം കാണുന്നത് മാത്രമല്ല, അതിനായി ദിനംപ്രതി പരിശ്രമിക്കുകയും മൂല്യാധിഷ്ഠിതമായ നേതൃഗുണങ്ങൾ വളർത്തുകയും വേണം,” എന്ന് കളക്ടർ വിദ്യാർത്ഥികളോട് പറഞ്ഞു. തുടർന്ന്, അദ്ദേഹം ഔപചാരികമായി *“ഇഗ്നൈറ്റ് മൈൻഡ്”** പദ്ധതിയുടെ ഉദ്ഘാടനം നിർവഹിച്ചു.

പദ്ധതിയുടെ ഭാഗമായി വിദ്യാർത്ഥികൾക്ക് വിവിധ മേഖലകളിലെ പ്രചോദനാത്മക വ്യക്തികളുമായി കൂടിക്കാഴ്ചകൾ, കരിയർ അഭിരുചി പരിശീലനങ്ങൾ, വ്യക്തിത്വ വികസന ക്യാമ്പുകൾ തുടങ്ങിയ വ്യത്യസ്ത പരിപാടികൾ സംഘടിപ്പിക്കും.

പ്രിൻസിപ്പൽ മുഹിയുദ്ദീൻ, മാനേജർ റഹീം ചുഴലി, ഇംഗ്ലീഷ് വിഭാഗം മേധാവി മുസവിർ അധ്യാപകരായ സാലിം,ജൈത്ര രാജേന്ദ്രൻ എന്നിവർ ചടങ്ങിൽ പങ്കെടുത്തു.