ട്രോളുകൾ കണ്ടു, തെറ്റുകൾ തിരുത്തി മുന്നോട്ട് പോകും; ഫേസ്ബുക്ക് കുറിപ്പുമായി മന്ത്രി പി.കെ. കുഞ്ഞാലിക്കുട്ടി

കഴിഞ്ഞ ദിവസം എറണാകുളത്ത് നടന്ന പരിപാടിയിൽ ആശംസകൾ കുറിക്കുന്നതിനിടയിൽ സംഭവിച്ച അക്ഷരപ്പിശകിനെക്കുറിച്ചുള്ള സോഷ്യൽ മീഡിയ ട്രോളുകളോട് പ്രതികരിച്ച് വ്യവസായ മന്ത്രി പി.കെ. കുഞ്ഞാലിക്കുട്ടി. ട്രോളുകളെല്ലാം തന്റെ ശ്രദ്ധയിൽപ്പെട്ടുവെന്നും, ജനങ്ങളുടെ വിമർശനങ്ങളെയും അഭിപ്രായങ്ങളെയും തികഞ്ഞ ജനാധിപത്യ ബോധത്തോടെയാണ് കാണുന്നതെന്നും മന്ത്രി തന്റെ ഫേസ്ബുക്ക് പോസ്റ്റിൽ വ്യക്തമാക്കി.

എഴുതുന്നതിനിടയിൽ ചുറ്റും ആളുകൾ സംസാരിക്കുന്നത് കേട്ടപ്പോഴുണ്ടായ ചെറിയൊരു ആശയക്കുഴപ്പത്തിലാണ് അക്ഷരപ്പിശക് സംഭവിച്ചതെന്ന് മന്ത്രി വിശദീകരിച്ചു. ഇത്തരം കാര്യങ്ങൾ ചൂണ്ടിക്കാട്ടുന്നത് നല്ലതാണെന്നും വരും ദിവസങ്ങളിൽ ഇക്കാര്യങ്ങളിൽ കൂടുതൽ ശ്രദ്ധ പുലർത്തുമെന്നും അദ്ദേഹം പറഞ്ഞു.

"ജനങ്ങൾക്ക് എപ്പോഴും വിമർശിക്കാനും തെറ്റുകൾ ചൂണ്ടിക്കാണിക്കാനുമുള്ള പൂർണ്ണ അധികാരമുണ്ട്. അവരുടെ അഭിപ്രായങ്ങൾ കേൾക്കുകയും അത് ഉൾക്കൊണ്ട് മുന്നോട്ട് പോവുകയും ചെയ്യുക എന്നതാണ് യു.ഡി.എഫിന്റെയും ഈ സർക്കാരിന്റെയും എന്റെയും നയം." - മന്ത്രി ഫേസ്ബുക്കിൽ കുറിച്ചു.

തെറ്റുകൾ ഉണ്ടെങ്കിൽ അത് മനസ്സിലാക്കി തിരുത്തി മുന്നോട്ട് പോകാനാണ് താൻ ആഗ്രഹിക്കുന്നതെന്ന് വ്യക്തമാക്കിയ മന്ത്രി, ജനങ്ങൾ നൽകിയ സ്നേഹത്തിനും തിരുത്തലുകൾക്കും ഹൃദയം നിറഞ്ഞ നന്ദിയും രേഖപ്പെടുത്തി.