കേരള നിയമസഭാ തെരഞ്ഞെടുപ്പ് ചരിത്രത്തിൽ പുതിയൊരു അധ്യായം രചിച്ച് മുസ്ലിം ലീഗ് അഖിലേന്ത്യാ ജനറൽ സെക്രട്ടറി പി.കെ. കുഞ്ഞാലിക്കുട്ടി. ഇത്തവണ മലപ്പുറം മണ്ഡലത്തിൽ അദ്ദേഹം നേടിയ ഭൂരിപക്ഷം കേവലം ഒരു വിജയമല്ല, മറിച്ച് സംസ്ഥാന രാഷ്ട്രീയത്തിലെ തന്നെ സമാനതകളില്ലാത്ത റെക്കോർഡാണ്. മുഖ്യമന്ത്രി പിണറായി വിജയന് ധർമ്മടത്ത് ആകെ ലഭിച്ച വോട്ടുകളോട് (85,614) തുല്യമായ സംഖ്യയാണ് കുഞ്ഞാലിക്കുട്ടി ഭൂരിപക്ഷമായി മാത്രം മലപ്പുറത്ത് സ്വന്തമാക്കിയത് എന്നത് രാഷ്ട്രീയ കേരളത്തെ അത്ഭുതപ്പെടുത്തിയിരിക്കുകയാണ്.
മലപ്പുറം മണ്ഡലത്തിൽ പി.കെ. കുഞ്ഞാലിക്കുട്ടിക്ക് ആകെ ലഭിച്ചത് 1,31,632 വോട്ടുകളാണ്. ഇതിലൂടെ അദ്ദേഹം സ്വന്തമാക്കിയ ഭൂരിപക്ഷം 85,327 വോട്ടുകളാണ്. ധർമ്മടത്ത് മുഖ്യമന്ത്രി പിണറായി വിജയൻ 85,614 വോട്ടുകൾ നേടിയപ്പോൾ അദ്ദേഹത്തിന്റെ ഭൂരിപക്ഷം 19,247 വോട്ടുകൾ മാത്രമായിരുന്നു.
ഒരു സ്ഥാനാർത്ഥിക്ക് മണ്ഡലത്തിൽ ലഭിച്ച ആകെ വോട്ടിനോളം ഭൂരിപക്ഷം മറ്റൊരു സ്ഥാനാർത്ഥിക്ക് ലഭിക്കുക എന്നത് തെരഞ്ഞെടുപ്പ് ചരിത്രത്തിലെ അപൂർവ്വ കാഴ്ചയാണ്.
കഴിഞ്ഞ നിയമസഭാ തെരഞ്ഞെടുപ്പിൽ കെ.കെ. ശൈലജ മട്ടന്നൂരിൽ സ്ഥാപിച്ച 60,963 വോട്ടുകളുടെ റെക്കോർഡ് ഭൂരിപക്ഷമാണ് കുഞ്ഞാലിക്കുട്ടി ഇത്തവണ പഴങ്കഥയാക്കിയത്.
മലപ്പുറം ജില്ലയിലെ മറ്റ് മണ്ഡലങ്ങളിലും യു.ഡി.എഫ് സ്ഥാനാർത്ഥികൾ പടുകൂറ്റൻ ഭൂരിപക്ഷമാണ് നേടിയത്. തിരൂരങ്ങാടിയിൽ പി.എം.എ. സമീർ നേടിയ 63,387 വോട്ടിന്റെ ലീഡാണ് ഇത്തവണ സംസ്ഥാനത്തെ ഏറ്റവും ഉയർന്ന രണ്ടാമത്തെ ഭൂരിപക്ഷം.
അര ലക്ഷത്തിനു മുകളിൽ ഭൂരിപക്ഷം നേടിയ പ്രമുഖർ:
1. പി.കെ. കുഞ്ഞാലിക്കുട്ടി (മലപ്പുറം): 85,327 (സംസ്ഥാന റെക്കോർഡ്)
2. പി.എം.എ. സമീർ (തിരൂരങ്ങാടി): 63,387
3. ആബിദ് ഹുസൈൻ തങ്ങൾ (കോട്ടക്കൽ): 62,638
4. എം. റഹ്മത്തുള്ള (മഞ്ചേരി): 57,887.
5. ടി.പി. അഷ്റഫലി (കൊണ്ടോട്ടി): 56,017
6. ആര്യാടൻ ഷൗക്കത്ത് (നിലമ്പൂർ): 54,851
7. ചാണ്ടി ഉമ്മൻ (പുതുപ്പള്ളി): 52,907
8. ടി.വി. ഇബ്രാഹീം (വള്ളിക്കുന്ന്): 51,289
9. ഉമ തോമസ് (തൃക്കാക്കര): 50,211
ജില്ലയിലുടനീളം ആഞ്ഞടിച്ച യു.ഡി.എഫ് തരംഗം എൽ.ഡി.എഫ് കോട്ടകളെ നിഷ്പ്രഭമാക്കിയെന്ന് മാത്രമല്ല, വരാനിരിക്കുന്ന രാഷ്ട്രീയ മാറ്റങ്ങളുടെ കൃത്യമായ സൂചന കൂടിയായി ഈ റെക്കോർഡ് ഭൂരിപക്ഷങ്ങൾ മാറുന്നു.
إرسال تعليق
Thanks