പ്രകൃതി പഠനയാത്ര വിദ്യാർത്ഥികൾക്കും മുതിർന്നവർക്കും നവ്യാനുഭവമായി

പെരുവള്ളൂർ: JCI തേഞ്ഞിപ്പലം മെട്രോയും MEC7 നവഭാരത് യൂണിറ്റും സംയുക്തമായി സംഘടിപ്പിച്ച പ്രകൃതി പഠനയാത്ര വിദ്യാർത്ഥികൾക്കും മുതിർന്നവർക്കും ഒരുപോലെ ശ്രദ്ധേയമായ അനുഭവമായി. പെരുവള്ളൂർ പഞ്ചായത്തിലെ ഒന്നാം വാർഡിലെ വലക്കണ്ടി മമ്പുറത്തിലെ അരുവിൽ നിന്നാരംഭിച്ച യാത്ര മഴക്കാലത്തിന്റെ സുന്ദരമായ പ്രകൃതി വഴികളിലൂടെ പുരോഗമിച്ചു.

50-ലധികം വിദ്യാർത്ഥികളും നാട്ടുകാരും പങ്കെടുത്ത ഈ യാത്ര പാടവരമ്പുകൾ, കുളങ്ങൾ, ചെറുകുഴികൾ എന്നിവ കടന്നുപോയി പ്രകൃതിയെ അടുത്തറിയാനുള്ള അവസരമായി മാറി. യാത്രയിലുടനീളം നാട്ടുകാരുടെ ആത്മാർത്ഥമായ സ്വീകരണവും ശ്രദ്ധേയമായി. മധുരപാനീയങ്ങൾ, ചായ, ഐസ്ക്രീം, വിവിധ പലഹാരങ്ങൾ എന്നിവ നൽകി അവർ പങ്കെടുത്തവരെ സ്വീകരിച്ചു.

പഞ്ചായത്ത് പ്രസിഡന്റ് സുനിൽ ഉത്ഘാടനം ചെയ്തു. വാർഡ് മെമ്പർ റഫീഖ് കൊയ്ത്തൊടി, MEC7 ചീഫ് കോഓർഡിനേറ്റർ മുസ്തഫ കെ.ടി. പെരുവള്ളൂർ, JCI നേതാക്കളായ ഡോ. ഷാഫി കളത്തിങ്ങൽ, ഡോ. അസ്കർ അലി, അസ്ലം പാലേരി, ഹനീഫ മാസ്റ്റർ, ഫെബിൻ കെ.ടി., അബ്ദുല്ല തുടങ്ങിയവർ യാത്രയിൽ പങ്കെടുത്തു.

കൗൺസിലിംഗ് സൈക്കോളജിസ്റ്റും JCI ഇന്ത്യ സോൺ ട്രെയിനറുമായ എം.എ. റഷീദ് പുത്തൂർ പള്ളിക്കൽ പരിപാടിയിൽ പങ്കെടുത്തു. ജെ സി ഐ തേഞ്ഞിപ്പാലം മെട്രോ ട്രഷററും സൈക്കോളജിക്കൽ കൗൺസിലറുമായ ഷഹനാസ് റഷീദ് യാത്രയിലുടനീളം അനുഗമിച്ചു.

പാത്തിക്കുഴി അണക്കെട്ടിന് സമീപം സമയം ചിലവഴിച്ച സംഘം, അതിന്റെ ചരിത്രം ഹനീഫ മാസ്റ്ററിൽ നിന്ന് അറിഞ്ഞു. ഡോ. അസ്കർ കുട്ടികളോടൊപ്പം നടത്തിയ ഇന്ററാക്ടീവ് ഗെയിമുകളും ഡോ. ഷാഫിയും അസ്ലം പാലേരിയും നയിച്ച സെഷനുകളും യാത്രയ്ക്ക് കൂടുതൽ ഉത്സാഹം പകർന്നു.

കൃഷിയിടങ്ങളിലെ നോക്കുകുത്തി കുട്ടികൾക്ക് പുതുമയാർന്ന അനുഭവമായി. വഴിയരികിൽ നാട്ടുകാരുമായി സംവദിച്ച് കൃഷിയെക്കുറിച്ചുള്ള അറിവുകളും പങ്കുവെച്ചു.

അബ്ദുല്ലത്തീഫ് കടക്കോട്ടേരി, മുഹമ്മദ് ഖൈസ് വയക്കാറത് എന്നിവർ സ്വീകരണ പരിപാടികൾക്ക് നേതൃത്വം നൽകി. നാട്ടുകാരുടെ സഹകരണവും സ്നേഹവും പങ്കെടുത്തവരെ ഏറെ സ്പർശിച്ചു.

ഇനിയും ഇത്തരത്തിലുള്ള പഠനയാത്രകൾ വ്യാപകമായി സംഘടിപ്പിക്കണമെന്ന ആവശ്യവും പങ്കെടുത്തവരിൽ നിന്നുയർന്നു.