കോഴിക്കോട് | ഉദ്ഘാടന ദിവസം ആളെക്കൂട്ടാൻ ‘ഒരു രൂപ നോട്ട് എത്തിച്ചാൽ നൂറു പേർക്ക് ഷൂ, പിന്നീടെത്തുന്ന നൂറു പേർക്ക് രണ്ടായിരം രൂപ വിലവരുന്ന വാച്ച്’. ഈ ഓഫർ സോഷ്യൽ മീഡിയയിൽ പ്രചരിപ്പിച്ച് സംഘർഷാവസ്ഥയ്ക്ക് ഇടയാക്കിയ കടയുടമയ്ക്കെതിരെ പൊലീസ് കേസ് എടുത്തു.
സൗജന്യം സംബന്ധിച്ച പരസ്യം കണ്ട് പുലർച്ചെ മൂന്നു മണി മുതൽ വിദ്യാർഥികൾ ഉൾപ്പെടെ നൂറുകണക്കിനു പേരാണ് വൈക്കം മുഹമ്മദ് ബഷീർ റോഡിലെ കടയ്ക്കു മുന്നിൽ തടിച്ചുകൂടിയത്. പത്തു മണിക്ക് ഉദ്ഘാടനസമയത്ത് ഷൂ നൽകുമെന്നായിരുന്നു വാഗ്ദാനം. കട തുറന്നതോടെ യുവാക്കൾ കടയ്ക്കുള്ളിലേക്ക് ഓഫർ വാങ്ങാൻ ഇടിച്ചുകയറുകയായിരുന്നു.
സ്ഥിതിഗതികൾ വഷളാകുമെന്നു കണ്ടതോടെ കടയുടമ തന്നെ പൊലീസിനെ വിവരമറിയിച്ചു. പൊലീസ് സ്ഥലത്തെത്തിയെങ്കിലും കടയ്ക്കു മുന്നിൽ തിക്കിതിരക്കിയ ജനക്കൂട്ടം പിരിഞ്ഞുപോകാൻ കൂട്ടാക്കിയില്ല. ഒടുവിൽ തിരക്കു നിയന്ത്രിക്കാൻ പൊലീസ് ലാത്തി വീശുകയായിരുന്നു.
ലാത്തിച്ചാർജിനിടെ ഓടിമാറി വീണും മറ്റും നിരവധി പേര്ക്കു പരുക്കേറ്റു. ഒരു രൂപ നോട്ടിനൊപ്പം പ്രത്യേക കൂപ്പൺ കൂടി കൊണ്ടു വരുന്നവർക്കാണ് ഓഫർ നൽകാനൊരുങ്ങിയതെന്ന് കടയുടമ പറഞ്ഞെങ്കിലും അതൊന്നും തിരക്കിനിടെ വിലപ്പോയില്ല. പൊതുജനങ്ങൾക്ക് ബുദ്ധിമുട്ടുണ്ടാക്കുന്ന തരത്തിൽ ആളെക്കൂട്ടിയതിനും വേണ്ടത്ര മുൻകരുതൽ സ്വീകരിക്കാത്തതിനുമാണ് കടയുടമയ്ക്കെതിരെ പൊലീസ് കേസ് എടുത്തത്.
إرسال تعليق
Thanks