തിരൂരങ്ങാടി: ശാരീരിക മാനസിക പരിമിതികളെ ആത്മവിശ്വാസം കൊണ്ട് തോൽപ്പിച്ച് ഭിന്നശേഷി പ്രതിഭകൾ ഒത്തുചേർന്നപ്പോൾ 'എബിലിറ്റി ബ്ലൂംസ് 2K25' നാടിന് പുത്തൻ അനുഭവമായി. വോയിസ് ഓഫ് ഡിസേബിൾഡ് നന്നമ്പ്രയുടെ ആഭിമുഖ്യത്തിൽ സംഘടിപ്പിച്ച കുടുംബ സംഗമവും കലോത്സവവും ഭിന്നശേഷി സമൂഹത്തിന് ഐക്യദാർഢ്യം പ്രഖ്യാപിക്കുന്ന വേദിയായി മാറി.
പ്രൗഢഗംഭീരമായ ഉദ്ഘാടനം
വോയിസ് ഓഫ് ഡിസേബിൾഡ് സ്റ്റേറ്റ് പ്രസിഡന്റ് ശ്രീ. നാസിർ മനയിൽ പരിപാടിയുടെ ഉദ്ഘാടനം നിർവഹിച്ചു. നന്നമ്പ്ര പ്രസിഡന്റ് ശ്രീ. നൗഷാദ് യു.വി. അധ്യക്ഷത വഹിച്ച ചടങ്ങിൽ സെക്രട്ടറി ശ്രീമതി റസീന ടീച്ചർ സ്വാഗതം ആശംസിച്ചു. പ്രമുഖ ജീവകാരുണ്യ പ്രവർത്തകൻ ശ്രീ. കബീർ മച്ചിഞ്ചേരി ചടങ്ങിൽ മുഖ്യാതിഥിയായിരുന്നു.
ആശംസകളർപ്പിച്ച് ജനപ്രതിനിധികൾ
പഞ്ചായത്ത് പ്രസിഡന്റ് മൊയ്തീൻകുട്ടി മാഷ്, ബ്ലോക്ക് മെമ്പർ ഷാഫി പൂക്കയിൽ, പഞ്ചായത്ത് പ്രതിനിധികളായ മുനീർ പി.പി, ജിജേഷ് എന്നിവർ സംഗമത്തിൽ പങ്കെടുത്തു. ഭിന്നശേഷിക്കാരുടെ സാമൂഹിക ശാക്തീകരണത്തിന് ഇത്തരം കൂട്ടായ്മകൾ വലിയ മാതൃകയാണെന്ന് അവർ അഭിപ്രായപ്പെട്ടു. ജില്ലാ പ്രസിഡന്റ് ശ്രീ. വേലായുധൻ, ജില്ലാ വൈസ് പ്രസിഡന്റ് ശ്രീ. ബാവ, നഗരസഭ പ്രസിഡന്റ് ശ്രീ. മാലിക്, ശ്രീമതി ഉമ്മുകുലുസു എന്നിവരും ആശംസകൾ നേർന്നു സംസാരിച്ചു.
പ്രതിഭകൾക്ക് ആദരം
വിവിധ മേഖലകളിൽ വ്യക്തിമുദ്ര പതിപ്പിച്ചവരെ ചടങ്ങിൽ ആദരിച്ചു. ജീവകാരുണ്യ പ്രവർത്തകൻ ശ്രീ. കബീർ മച്ചിഞ്ചേരി, ഭിന്നശേഷി ശക്തീകരണ പ്രവർത്തകൻ ശ്രീ. അഷ്റഫ് കുന്നത്ത്, ശ്രീ. നാസിർ മനയിൽ, ടാങ്കി ബോയ്സ് (Tankee Boys), ശ്രീമതി റംല, ശ്രീ. നൗഫൽ ആലത്തിയൂർ എന്നിവർ ആദരം ഏറ്റുവാങ്ങി.
സേവനസന്നദ്ധമായി യുവത്വം
ശ്രീ. ലെവൽ മുഞ്ഞാടി, ടൗൺ ടീം ആൻഡ് വെൽനസ് ക്ലബ്ബ് പ്രവർത്തകർ, വോയിസ് ഓഫ് ഡിസേബിൾഡ് വോളന്റിയർമാർ എന്നിവരുടെ സേവനസന്നദ്ധത പരിപാടിയുടെ വിജയത്തിന് മാറ്റുകൂട്ടി. ഭിന്നശേഷി പ്രതിഭകൾ അവതരിപ്പിച്ച കലാപരിപാടികൾ കാണികളിൽ ആവേശം നിറച്ചു. ശിഹാബ് എലായ് അവതാരകനായി പരിപാടികൾ നിയന്ത്രിച്ചു. ഉപദേശക സമിതി അംഗം ശ്രീ. ശശി മാഷ് നന്ദി രേഖപ്പെടുത്തി
Post a Comment
Thanks