ഡിസംബര്‍ 4-നകം എസ് ഐ ആര്‍ ഫോം സമര്‍പ്പിച്ചില്ലെങ്കില്‍ എന്ത് സംഭവിക്കും? അറിയേണ്ട കാര്യങ്ങള്‍!

ഇന്ത്യൻ ജനാധിപത്യത്തിന്റെ നെടുംതൂണായ വോട്ടവകാശം ഉറപ്പാക്കുന്നതില്‍ അതീവ നിർണായകമായ ഒരു നടപടിയാണ് സ്‌പെഷ്യല്‍ ഇന്റൻസീവ് റിവിഷൻ (SIR) എന്നറിയപ്പെടുന്ന പ്രത്യേക തീവ്ര വോട്ടർ പട്ടിക പുതുക്കല്‍ പ്രക്രിയ.

നിലവിലെ വോട്ടർ പട്ടികയിലെ എല്ലാ വിവരങ്ങളും കൃത്യവും പൂർണവുമാണെന്ന് ഉറപ്പുവരുത്തുക, ഒപ്പം അനർഹരെ ഒഴിവാക്കി യഥാർത്ഥത്തില്‍ വോട്ടവകാശമുള്ളവരെ മാത്രം ഉള്‍പ്പെടുത്തുക എന്നതാണ് ഈ ഉദ്യമത്തിന്റെ പ്രധാന ലക്ഷ്യം.

ബൂത്ത് ലെവല്‍ ഓഫീസർമാർ (BLO) വീടുകള്‍ തോറും എത്തി വിതരണം ചെയ്യുന്ന ഈ എന്യൂമറേഷൻ ഫോം പൂരിപ്പിച്ച്‌ തിരികെ നല്‍കേണ്ടത് ഓരോ വോട്ടറുടേയും നിർബന്ധ ബാധ്യതയാണ്. വർഷങ്ങള്‍ക്കിപ്പുറം നടത്തുന്ന ഇത്രയും വിപുലമായ ഒരു പരിശോധന വോട്ടർപട്ടികയുടെ കൃത്യത വർദ്ധിപ്പിക്കാൻ അത്യന്താപേക്ഷിതമാണ്. നിങ്ങളുടെ തിരിച്ചറിയല്‍ കാർഡ് നമ്ബർ, ആധാർ വിവരങ്ങള്‍ (ഓപ്ഷണല്‍), ജനനത്തീയതി, മൊബൈല്‍ നമ്ബർ, കൂടാതെ 2002-ലെ എസ് ഐ ആർ രേഖകളുമായുള്ള ബന്ധം എന്നിവ ഈ ഫോമില്‍ നല്‍കേണ്ടതുണ്ട്.

ഒരു രാജ്യത്തെ പൗരനെന്ന നിലയില്‍ വോട്ടവകാശം വിനിയോഗിക്കാനുള്ള പ്രാഥമിക കടമ്ബയായി ഇതിനെ കാണേണ്ടതുണ്ട്.

ഡിസംബർ 4-ന് ശേഷമുള്ള ഭവിഷ്യത്തുകള്‍

നിർദ്ദിഷ്ട സമയപരിധി അവസാനിക്കുമ്ബോള്‍ എസ് ഐ ആർ ഫോം സമർപ്പിക്കാൻ സാധിക്കാതെ പോകുന്നവർക്ക് നിരവധി പ്രത്യാഘാതങ്ങള്‍ നേരിടേണ്ടിവരാം. ഏറ്റവും പ്രധാനമായി സംഭവിക്കുന്നത്, നിങ്ങളുടെ പേര് പുതുതായി തയ്യാറാക്കുന്ന കരട് വോട്ടർ പട്ടികയില്‍ നിന്ന് ഒഴിവായിപ്പോകാൻ സാധ്യതയുണ്ട് എന്നതാണ്. ബൂത്ത് ലെവല്‍ ഓഫീസർമാർ മൂന്ന് തവണ വരെ വീടുകള്‍ സന്ദർശിച്ച്‌ ഫോം ശേഖരിക്കാൻ ശ്രമിക്കുമെങ്കിലും, ഫോം ലഭ്യമല്ലെങ്കില്‍ വോട്ടറുടെ വിവരങ്ങള്‍ പുതുക്കപ്പെടാതെ പോകുകയും കരട് പട്ടികയില്‍ നിന്ന് പുറത്താകുകയും ചെയ്യാം.

ഇവിടെ ഭയപ്പെടേണ്ട ഒരു കാര്യം, പേര് ഒഴിവാക്കപ്പെട്ടു എന്ന് കരുതി വോട്ടവകാശം പൂർണമായി റദ്ദാക്കപ്പെടുന്നില്ല എന്നതാണ്, എന്നാല്‍ നിങ്ങളുടെ വോട്ടർ ഐഡി (EPIC) ഉണ്ടായിരുന്നെങ്കില്‍ പോലും പേര് ഒഴിവാക്കപ്പെടാം. കൃത്യമായ പരിശോധനയ്ക്കായി തെരഞ്ഞെടുപ്പ് രജിസ്‌ട്രേഷൻ ഓഫീസർക്ക് (ERO) നിങ്ങള്‍ക്ക് നോട്ടീസ് നല്‍കേണ്ടതായും വരാം. ചില സാഹചര്യങ്ങളില്‍, അനർഹരെന്ന് സംശയിക്കപ്പെടുന്ന വ്യക്തികളെക്കുറിച്ച്‌ അന്വേഷണം (Suo motu enquiry) ആരംഭിക്കാനും, അത് പൗരത്വ നിയമപ്രകാരമുള്ള നടപടികളിലേക്ക് വരെ നീങ്ങാനും സാധ്യതയുണ്ട്.

രണ്ടാമതൊരു അവസരമുണ്ട്

ഡിസംബർ നാലിനകം ഫോം സമർപ്പിക്കാൻ കഴിയാത്തവർക്ക് ആശ്വാസം നല്‍കുന്ന ഒരു 'രണ്ടാമത്തെ അവസരം' തിരഞ്ഞെടുപ്പ് കമ്മീഷൻ നല്‍കുന്നുണ്ട്. ഡിസംബർ ഒമ്ബതിന് കരട് വോട്ടർ പട്ടിക പ്രസിദ്ധീകരിച്ച ശേഷം, 2026 ജനുവരി എട്ട് വരെ നീണ്ടുനില്‍ക്കുന്ന ക്ലെയിംസ് ആൻഡ് ഒബ്ജക്ഷൻസ് കാലയളവില്‍ നിങ്ങള്‍ക്ക് നിങ്ങളുടെ പേര് കൂട്ടിച്ചേർക്കാൻ അപേക്ഷ നല്‍കാം.

ഇതിനായി ഫോം 6 ഉപയോഗിച്ച്‌ ഓണ്‍ലൈനായോ (voters(dot)eci(dot)gov(dot)in) അല്ലെങ്കില്‍ ബൂത്ത് ലെവല്‍ ഓഫീസർമാർ മുഖേനയോ അപേക്ഷ സമർപ്പിക്കാവുന്നതാണ്. എന്നാല്‍, ഈ ഘട്ടത്തില്‍ അപേക്ഷിക്കുന്നവർക്ക് ഒരു അധിക കടമ്ബയുണ്ട്: അവർ തിരഞ്ഞെടുപ്പ് രജിസ്‌ട്രേഷൻ ഓഫീസർക്ക് മുമ്ബാകെ നേരിട്ട് ഹാജരായി തങ്ങളുടെ യോഗ്യത തെളിയിക്കേണ്ടി വരും. കൃത്യമായ രേഖകള്‍ ഹാജരാക്കി യോഗ്യത തെളിയിക്കുന്നതില്‍ പരാജയപ്പെട്ടാല്‍, അന്തിമ വോട്ടർ പട്ടികയില്‍ നിന്ന് നിങ്ങളുടെ പേര് നീക്കം ചെയ്യപ്പെടാൻ സാധ്യതയുണ്ട്.

അന്തിമ വോട്ടർ പട്ടിക 2026 ഫെബ്രുവരി ഏഴിന് പ്രസിദ്ധീകരിക്കും. അതുകൊണ്ട്, ഈ ബുദ്ധിമുട്ടുകള്‍ ഒഴിവാക്കാൻ ഡിസംബർ നാലിനകം ഫോം സമർപ്പിക്കാൻ പ്രത്യേകം ശ്രദ്ധിക്കുക.