തിരുവനന്തപുരം: രാഹുൽ മാങ്കൂട്ടത്തിലിനെതിരെ ഉയർന്ന ആരോപണങ്ങളിൽ പാർട്ടി പരിശോധിച്ച് മുഖം നോക്കാതെ നടപടിയെടുക്കുമെന്ന് പ്രതിപക്ഷ നേതാവ് വി.ഡി.സതീശൻ. പരാതി ഗൗരവമുള്ളതാണ്. അതിന്റേതായ ഗൗരവത്തിൽ തന്നെയാണ് ഇതിനെ കാണുന്നതെന്നും അദ്ദേഹം വ്യക്തമാക്കി.
പരാതി ഉന്നയിച്ച പെൺകുട്ടി തനിക്ക് മകളെപ്പോലെയാണെന്നും മെസേജ് അയച്ച വിഷയം തന്റെ മുന്നിലെത്തിയിരുന്നുവെന്നും സതീശൻ പറഞ്ഞു. എന്നാൽ ഒരു പിതാവിനെ പോലെ താൻ മെസേജ് അയച്ചതുമായി ബന്ധപ്പെട്ട പരാതിയിൽ ഇടപെടൽ നടത്തിയെന്നും അദ്ദേഹം കൂട്ടിച്ചേർത്തു. ഇപ്പോൾ ഉയർന്ന മറ്റു ആരോപണങ്ങളൊന്നും തനിക്ക് മുന്നിൽ എത്തിയിട്ടില്ലെന്നും സതീശൻ പറഞ്ഞു.
'പാർട്ടിക്കകത്തുള്ള ഏത് നേതാവിനെതിരെയും ഇതുപോലുള്ള ഗുരുതരമായ ആരോപണങ്ങൾ വന്നാൽ പാർട്ടി അത് ഗൗരവമായി പരിശോധിക്കുകയും മുഖംനോക്കാതെ നടപടിയെടുക്കുകയും ചെയ്യും. ആരായാലും ഒരു വിട്ടുവീഴ്ചയും ചെയ്യില്ല.
ആരോപണം ഉന്നയിച്ച കുട്ടിയെ വിവാദത്തിലേക്ക് വലിച്ചിഴക്കുന്നില്ല. എന്റെ മകളെപോലോത്തെ കുട്ടിയാണ് അവർ. മെസേജ് അയച്ചത് മാത്രമല്ല, അല്ലാതെ ഉയർന്ന ആരോപണങ്ങൾ ചെയ്തിട്ടുണ്ടെങ്കിൽ കർശനമായി പാർട്ടി കൈകാര്യം ചെയ്യും. എത്ര വലിയ നേതാവായാലും മുഖം നോക്കാതെ നടപടിയെടുക്കും. അതിന് ഞാൻ തന്നെ മുൻകൈയെടുക്കും.
ഒരു തെറ്റായ മെസേജ് അയച്ചുവെന്ന് മകളെ പോലുള്ള ഒരു കുട്ടി വന്ന് പറഞ്ഞാൽ, ഒരു പിതാവ് ചെയ്യുന്നത് പോലെ ഞാനും ചെയ്തിട്ടുണ്ട്. പക്ഷേ ഉയർന്നുവന്ന ആരോപണം പാർട്ടി ഗൗരവമായി പരിശോധിക്കും' സതീശൻ പറഞ്ഞു.
Post a Comment
Thanks