തട്ടത്തലം മേലേപ്പുറത്തെ 2 കോടി കവർച്ച;വടിവാളും മൊബൈൽ ഫോണും കിണറ്റിൽനിന്ന് കണ്ടെത്തി

നന്നമ്പ്ര: കാർ ആക്രമിച്ച് 1.92 കോടി രൂപ കവർന്ന കേസിൽ പ്രതിയായ താഴെ ചിന സ്വദേശി തടത്തിൽ കരീമിനെ (54) പോലീസ് തെളിവെടുപ്പിന് കൊണ്ടുവന്നു.

 കുണ്ടു ചിനയിലെ ഒഴിഞ്ഞ പറമ്പിലെ കിണറ്റിൽനിന്ന് കാർ ആക്രമിക്കാൻ ഉപയോഗിച്ച മൂന്ന് വടിവാളുകളും പണത്തോടൊപ്പം കൊണ്ടുപോയ ഹനീഫയുടെ മൊബൈൽ ഫോണും കണ്ടെത്തി. കരീമിന്റെ വീട്ടിൽ നടത്തിയ പരിശോധനയിൽ അഞ്ച് ലക്ഷം രൂപയും ലഭിച്ചു.

കേസിൽ തടത്തിൽ കരീം (54), പന്താരങ്ങാടി വലിയ പീടിയേക്കൽ മുഹമ്മദ് ഫവാസ് (35), ഉള്ളണം മംഗലശ്ശേരി രജീഷ് (44) എന്നിവരെ പോലീസ് അറസ്റ്റ് ചെയ്തു. സംഭവത്തിനുശേഷം ഇവർ ഓഗസ്റ്റ് 16-ന് ഗോവയിലേക്ക് കടന്നിരുന്നു. തനൂർ ഡി.വൈ.എസ്.പി.യുടെ നേതൃത്വത്തിലുള്ള പ്രത്യേക അന്വേഷണ സംഘം ഗോവയിൽ എത്തി ഇവരെ പിന്തുടർന്നു. കോഴിക്കോട്ടുവെച്ച് കരീമിനെയും രജീഷിനെയും പിടികൂടി, ഇവരിൽനിന്നുള്ള വിവരങ്ങളുടെ അടിസ്ഥാനത്തിൽ ഫവാസിനെ അറസ്റ്റ് ചെയ്തു.

ഈ മാസം 14-ന് തെയ്യാല തട്ടത്തലം ഹൈസ്കൂൾ പടിയിൽവെച്ചാണ് സംഭവം. തെന്നല സ്വദേശി പറമ്പിൽ മുഹമ്മദ് ഹനീഫ, ബന്ധു അഷ്റഫ് തെന്നല എന്നിവർ കൊടിഞ്ഞി ചെറുപ്പാറയിലെ ഒരു വ്യക്തിയിൽനിന്ന് 1.925 കോടി രൂപ വാങ്ങി മേലേപ്പുറം ഇറാക്കത്തിൽ വരുമ്പോൾ, മുഖംമൂടി ധരിച്ചെത്തിയ നാലംഗ സംഘം നീല ആൾട്ടോ കാറിൽ എത്തി. വടിവാളുകളും ഹോക്കി സ്റ്റിക്കും ഉപയോഗിച്ച് കാറിന്റെ ചില്ല് തകർത്ത് നാല് ബാഗുകളിലായി സൂക്ഷിച്ച പണം കവർന്ന് കൊടിഞ്ഞി ഭാഗത്തേക്ക് രക്ഷപ്പെട്ടു.

കേസിൽ മൂന്ന് പേർ പിടിയിലായെങ്കിലും, ഒരു ആക്രമണ പ്രതിയും ക്വട്ടേഷൻ നൽകിയ രണ്ട് പേരും ഉൾപ്പെടെ മൂന്ന് പേർ ഇനിയും കണ്ടെത്താനുണ്ട്. ചില പ്രതികൾ കേരളത്തിന് പുറത്തേക്കും ഗൾഫിലേക്കും കടന്നതായി വിവരം. പോലീസ് 500-ലധികം സി.സി.ടി.വി. ദൃശ്യങ്ങളും 2000-ത്തിലധികം പേരുടെ ഫോൺ വിവരങ്ങളും പരിശോധിച്ചാണ് പ്രതികളിലേക്കെത്തിയത്. അഞ്ച് ദിവസത്തെ തീവ്ര പരിശോധനയ്ക്കും രണ്ട് ദിവസത്തെ അന്വേഷണത്തിനും ശേഷമാണ് പ്രതികളെ പിടികൂടിയത്. ബാക്കി പ്രതികളെ കണ്ടെത്താൻ പോലീസ് മഹാരാഷ്ട്രയിലും എത്തിയിട്ടുണ്ട്. കാറിന് വ്യാജ നമ്പർ പ്ലേറ്റ് ഉപയോഗിച്ചിരുന്നു, കാർ കണ്ടെത്തിയതായും പോലീസ് അറിയിച്ചു.

പണ ഇടപാടിനെക്കുറിച്ച് വ്യക്തമായി അറിയാവുന്ന വ്യക്തിയാണ് ക്വട്ടേഷന് പിന്നിലെന്ന് പോലീസ് വെളിപ്പെടുത്തി. കരീം 11 കേസുകളിൽ പ്രതിയാണ്, കാപ്പ നിയമപ്രകാരം മുമ്പ് അറസ്റ്റിലായിട്ടുണ്ട്. മൂന്ന് മാസം മുമ്പ് കവർച്ച ആസൂത്രണം ചെയ്ത്, വാളുകൾ, മുഖംമൂടി, കാർ എന്നിവ തയാറാക്കിയതായി പോലീസ് കണ്ടെത്തി. കൃത്യത്തിനുശേഷം കാർ പാലക്കാട് വിൽക്കാൻ ഏൽപ്പിച്ചിരുന്നു.