ഈങ്ങാപ്പുഴയിൽ വെള്ളമിറങ്ങി: ദേശീയപാതയിൽ ഗതാഗതം പുനഃസ്ഥാപിച്ചു, ചുരത്തിൽ ഗതാഗത നിയന്ത്രണം തുടരുന്നു

ഈങ്ങാപ്പുഴ: ദേശീയപാതയിൽ രൂക്ഷമായ വെള്ളക്കെട്ടുണ്ടായ ഈങ്ങാപ്പുഴയിൽ മഴയുടെ ശക്തി കുറഞ്ഞതോടെ വെള്ളം ഇറങ്ങിത്തുടങ്ങി. ഇതോടെ പ്രദേശത്ത് തടസ്സപ്പെട്ടിരുന്ന വാഹനഗതാഗതം പുനഃസ്ഥാപിച്ചു. വാഹനങ്ങൾ ഈങ്ങാപ്പുഴ വഴി ഓടിത്തുടങ്ങിയിട്ടുണ്ട്. മഴയ്ക്ക് നേരിയ ശമനമുണ്ടായത് പ്രദേശവാസികൾക്കും യാത്രക്കാർക്കും വലിയ ആശ്വാസമായി.

എന്നാൽ താമരശ്ശേരി ചുരത്തിലും ലക്കിടി മേഖലകളിലും ചുരത്തിന്റെ മലയോര പ്രദേശങ്ങളിലും ഇപ്പോഴും ശക്തമായ മഴ തുടരുകയാണ്. അപകടസാധ്യത കണക്കിലെടുത്ത് ചുരം വഴി വലിയ വാഹനങ്ങൾക്ക് പ്രവേശനം പൂർണ്ണമായും വിലക്കിയിട്ടുണ്ട്. ലക്കിടി ഭാഗത്തുനിന്ന് അത്യാവശ്യമായി പോകേണ്ട ചെറിയ വാഹനങ്ങൾ മാത്രമാണ് നിയന്ത്രിത അളവിൽ കുറച്ചുകുറച്ചായി കടത്തിവിടുന്നത്. സുരക്ഷ ഉറപ്പാക്കുന്നതിന്റെ ഭാഗമായി ഈ മേഖലയിൽ കടുത്ത ഗതാഗത നിയന്ത്രണം തുടരുകയാണ്.

മലയോര മേഖലകളിൽ ഉരുൾപൊട്ടലിനും മണ്ണിടിച്ചിലിനും സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്നും അനാവശ്യ യാത്രകൾ ഒഴിവാക്കണമെന്നും അധികൃതർ അറിയിച്ചു.