മലപ്പുറത്ത് വീണ്ടും പ്ലസ് വണ്‍ സീറ്റ് പ്രതിസന്ധി രൂക്ഷം; നാലായിരത്തി എണ്ണൂറിലധികം വിദ്യാര്‍ത്ഥികള്‍ക്ക് പ്രവേശനം പ്രതിസന്ധിയില്‍

മലപ്പുറം ജില്ലയിലെ ഹയര് സെക്കന്ഡറി പ്രവേശനവുമായി ബന്ധപ്പെട്ട സീറ്റ് പ്രതിസന്ധി ഇത്തവണയും വിദ്യാര്ത്ഥികളെയും രക്ഷിതാക്കളെയും ഒരുപോലെ ആശങ്കയിലാഴ്ത്തുന്നു.ആദ്യഘട്ട അപേക്ഷാ നടപടികള് പൂര്ത്തിയായപ്പോൾ ലഭ്യമായ ആകെ സീറ്റുകളേക്കാൾ അപേക്ഷകരുടെ എണ്ണം വലിയ രീതിയില് വർധിച്ചതാണ് ജില്ലയില് പതിവുപോലെ പ്രതിസന്ധി സൃഷ്ടിച്ചിരിക്കുന്നത്.

ഇത്തവണ പ്ലസ് വണ് കോഴ്സുകൾക്കായി ജില്ലയില് ആകെ 82,678 വിദ്യാര്ത്ഥികളാണ് രജിസ്റ്റര് ചെയ്തിട്ടുള്ളത്. എന്നാൽ ജില്ലയിലെ ഗവണ്മെന്റ്, എയ്ഡഡ്, അണ്എയ്ഡഡ് മേഖലകളിലെ മുഴുവൻ സ്കൂളുകളിലെയും സീറ്റുകൾ കൂട്ടിയാൽ പോലും ആകെ 77,865 സീറ്റുകൾ മാത്രമാണുള്ളത്. ഇത് പ്രകാരം 4,800ലധികം കുട്ടികള്‍ക്ക് തുടർപഠനത്തിന് സീറ്റ് ലഭിക്കാത്ത സാഹചര്യമാണ് നിലവിലുള്ളത്.

മറ്റ് ജില്ലകളിൽ നിന്നും മലപ്പുറത്തേക്ക് അപേക്ഷിക്കുന്നവരുടെ എണ്ണത്തിൽ ഇത്തവണ പ്രകടമായ വർധനവുണ്ട്; 8,201 അപേക്ഷകർ ജില്ലയ്ക്ക് പുറത്തുനിന്നുള്ളവരാണ്. അപേക്ഷകരുടെ സിലബസ് തിരിച്ചുള്ള കണക്കുകൾ പരിശോധിച്ചാൽ സംസ്ഥാന സിലബസിൽ നിന്ന് 79,680 പേരും, സിബിഎസ്‌ഇയിൽ നിന്ന് 2,109 പേരും, ഐസിഎസ്‌ഇയിൽ നിന്ന് 23 പേരും, മറ്റ് ബോർഡുകളിൽ നിന്ന് 866 പേരും ഉള്‍പ്പെടുന്നു. ഇതിൽ 42 വിദ്യാര്ത്ഥികൾ ഇതിനകം തന്നെ മോഡൽ റസിഡന്ഷ്യൽ സ്കൂളുകളിൽ തങ്ങളുടെ പ്രവേശനം ഉറപ്പാക്കിയിട്ടുണ്ട്.

വര്‍ഷങ്ങളായി തുടരുന്ന ഈ സീറ്റ് ക്ഷാമത്തിന് ശാശ്വത പരിഹാരം കാണാൻ സര്ക്കാരിന് സാധിക്കുന്നില്ലെന്ന് ആരോപിച്ച്‌ എസ്‌എഫ്ഐ, ഫ്രറ്റേണിറ്റി മൂവ്മെന്റ് തുടങ്ങിയ വിദ്യാര്‍ത്ഥി സംഘടനകൾ ശക്തമായ പ്രതിഷേധവുമായി രംഗത്തെത്തിയിട്ടുണ്ട്. ഈ പ്രതിസന്ധി പരിഹരിക്കാൻ കഴിഞ്ഞ പത്ത് വര്‍ഷമായി അധിക ബാച്ചുകൾ അനുവദിക്കുന്നത് ഉൾപ്പെടെയുള്ള നിരവധി താല്‍ക്കാലിക നടപടികൾ എല്‍ഡിഎഫ് സർക്കാർ സ്വീകരിച്ചിട്ടുണ്ടെന്ന് എസ്‌എഫ്ഐ മലപ്പുറം ജില്ലാ പ്രസിഡന്റ് സുജിന് വളാഞ്ചേരി അഭിപ്രായപ്പെട്ടു.

എന്നാൽ ഓരോ വര്ഷവും അപേക്ഷകരുടെ എണ്ണത്തിൽ വലിയ വർദ്ധനവാണ് ഉണ്ടാകുന്നത്. ഒരു വിദ്യാര്‍ത്ഥിക്ക് പോലും സീറ്റ് നഷ്ടമാകുന്ന അവസ്ഥ ഉണ്ടാകരുതെന്നും സർക്കാർ അടിയന്തരമായി പുതിയ ബാച്ചുകൾ അനുവദിക്കണമെന്നും അദ്ദേഹം ആവശ്യപ്പെട്ടു. ഒപ്പം, അധിക ബാച്ചുകൾ നൽകുമ്പോൾ സ്കൂളുകളിലെ അടിസ്ഥാന സൗകര്യങ്ങൾ കൂടി വികസിപ്പിക്കേണ്ടതുണ്ട്. പല ക്ലാസ് മുറികളിലും നിലവിൽ 60 മുതല് 65 കുട്ടികളെ വരെ ഇരുത്തിയാണ് പഠിപ്പിക്കുന്നത്. ഈ സാഹചര്യം ഒഴിവാക്കാന് അടിസ്ഥാന സൗകര്യങ്ങൾ നവീകരിക്കാന് സർക്കാർ തയ്യാറാകണമെന്നും സുജിന് കൂട്ടിച്ചേര്‍ത്തു.

അതേസമയം, അധിക സീറ്റുകൾ താല്ക്കാലികമായി അനുവദിക്കുന്നതും മാർജിനൽ വർധനവ് നടപ്പാക്കുന്നതും പ്രശ്നത്തിന്റെ യഥാര്‍ത്ഥ കാരണത്തെ മൂടിവയ്ക്കുന്ന താല്‍ക്കാലിക താലോലിക്കലുകൾ മാത്രമാണെന്ന് ഫ്രറ്റേണിറ്റി മൂവ്മെന്റ് കുറ്റപ്പെടുത്തി. മലപ്പുറത്തെ ഈ വലിയ വിവേചനം പൂര്‍ണ്ണമായി പരിഹരിക്കാൻ കുറഞ്ഞത് 628 സ്ഥിരമായ അധിക ബാച്ചുകളെങ്കിലും അനുവദിക്കേണ്ടതുണ്ടെന്ന് സംഘടന ചൂണ്ടിക്കാണിച്ചു.

വിദ്യാര്ത്ഥി പ്രക്ഷോഭങ്ങളെ തുടര്‍ന്ന് മുൻ വർഷങ്ങളിൽ നടപ്പിലാക്കിയ താല്‍ക്കാലിക ക്രമീകരണങ്ങളെ മലബാറിലെ, പ്രത്യേകിച്ച്‌ മലപ്പുറത്തെ സീറ്റ് പ്രതിസന്ധിക്കുള്ള ശാശ്വത പരിഹാരമായി ചിത്രീകരിക്കുന്നത് ജനങ്ങളെ തെറ്റിദ്ധരിപ്പിക്കാനാണെന്ന് ഫ്രറ്റേണിറ്റി സംസ്ഥാന പ്രസിഡന്റ് നയീം ഗഫൂര് പറഞ്ഞു.

പ്രശ്നം അടുത്ത വര്ഷത്തേക്ക് നീട്ടിവയ്ക്കാതെ ഈ വര്ഷം തന്നെ കുറഞ്ഞത് 628 ബാച്ചുകളെങ്കിലും അനുവദിച്ച്‌ ശാശ്വത പരിഹാരം കാണാൻ സർക്കാർ തയ്യാറാകണം. സീറ്റ് ക്ഷാമം പരിഹരിക്കാൻ അധികൃതർ അടിയന്തരമായി ഇടപെട്ടില്ലെങ്കിൽ ജില്ലയിലുടനീളം ശക്തമായ ജനകീയ പ്രക്ഷോഭങ്ങൾ ആരംഭിക്കുമെന്നാണ് എസ്‌എഫ്ഐയും ഫ്രറ്റേണിറ്റി മൂവ്മെന്റും മുന്നറിയിപ്പ് നല്കിയിരിക്കുന്നത്.