മുഖ്യമന്ത്രിയായ ശേഷമുള്ള ആദ്യ മലബാർ യാത്ര പാണക്കാട്ടേക്ക്; പെരുന്നാൾ ദിനത്തിൽ കൂടിക്കാഴ്ച നടത്തി വി.ഡി സതീശൻ

മലപ്പുറം: പെരുന്നാൾ ദിനത്തിൽ പാണക്കാട് സന്ദർശിച്ച് മുസ്ലിം ലീഗ് നേതൃത്വവുമായി കൂടിക്കാഴ്ച നടത്തി മുഖ്യമന്ത്രി വി.ഡി സതീശൻ. പാണക്കാട് സയ്യിദ് സാദിഖലി ശിഹാബ് തങ്ങൾ, പി.കെ കുഞ്ഞാലിക്കുട്ടി ഉൾപ്പെടെയുള്ള പ്രമുഖ നേതാക്കളുമായാണ് മുഖ്യമന്ത്രി ഔദ്യോഗിക കൂടിക്കാഴ്ച നടത്തിയത്.

മുഖ്യമന്ത്രിയായി ചുമതലയേറ്റ ശേഷം മലബാർ മേഖലയിലേക്കുള്ള തന്റെ ആദ്യ ഔദ്യോഗിക യാത്ര പാണക്കാട്ടേക്കാണെന്ന് വി.ഡി സതീശൻ. ഈ ശുഭദിനത്തിൽ സാദിഖലി തങ്ങൾ, കുഞ്ഞാലിക്കുട്ടി തുടങ്ങിയ പ്രമുഖ നേതാക്കളെ നേരിൽ കാണാനും പെരുന്നാൾ ആശംസകൾ പങ്കുവെക്കാനും കഴിഞ്ഞതിൽ അതിയായ സന്തോഷമുണ്ടെന്നും അദ്ദേഹം.

കേരളത്തിൽ എല്ലാ വിഭാഗം ജനങ്ങൾക്കും എല്ലാവിധ ആഘോഷങ്ങളും ജാതി-മത ഭേദമന്യേ ഒത്തൊരുമയോടെ ഒരുമിച്ച് ആഘോഷിക്കാൻ പറ്റുന്ന നല്ല നാളുകളായി ഇനിയുള്ള ദിവസങ്ങൾ മാറും. അത്തരമൊരു ഐക്യ അന്തരീക്ഷം കേരളത്തിൽ പൂർണ്ണമായും നടപ്പാക്കുക എന്നതാണ് സർക്കാരിന്റെ പ്രധാന ലക്ഷ്യമെന്നും മുഖ്യമന്ത്രി.

മുഖ്യമന്ത്രിയുടെ ഈ അപ്രതീക്ഷിത സന്ദർശനത്തിൽ പാണക്കാട് സയ്യിദ് സാദിഖലി ശിഹാബ് തങ്ങൾ പ്രത്യേക സന്തോഷം പ്രകടിപ്പിച്ചു. പാണക്കാട് തറവാട്ടിലെത്തിയ മുഖ്യമന്ത്രിക്ക് ഹൃദ്യമായ സ്വീകരണമാണ് നേതാക്കൾ ഒരുക്കിയത്.

തുടർന്ന് നേതാക്കൾക്കൊപ്പം പ്രഭാതഭക്ഷണം കൂടി കഴിച്ച ശേഷമാണ് മുഖ്യമന്ത്രി വി.ഡി സതീശൻ പാണക്കാട്ടു നിന്നും മടങ്ങിയത്.