വാട്സ്ആപ്പ് ഹാക്ക് ചെയ്യപ്പെട്ടോ ? എങ്ങനെ തിരിച്ചറിയാം, വീണ്ടെടുക്കാനുള്ള വഴി ഇങ്ങനെ

ഇന്ത്യയിൽ ഏറ്റവും കൂടുതൽ പേർ ഉപയോഗിക്കുന്ന ഇൻസ്റ്റന്റ് മെസേജിംഗ് ആപ്പാണ് വാട്‌സ്ആപ്പ്. കേവലമൊരു ചാറ്റ് പ്ലാറ്റ്ഫോം എന്നതിനപ്പുറം വാട്‌സ്ആപ്പ് പേ അടക്കമുള്ള മൂല്യാധിഷ്‌ഠിത സേവനങ്ങളും വാട്‌സ്ആപ്പിലുണ്ട്. വാട്‌സ്ആപ്പ് അക്കൗണ്ട് ഹാക്ക് ചെയ്യപ്പെട്ടാൽ ഐഡൻ്റിറ്റിയും മെസേജുകളും ഫോട്ടോകളും വീഡിയോകളും ഡോക്യുമെൻ്റുകളും സാമ്പത്തിക ഇടപാടുകളുമെല്ലാം വലിയ അപകടത്തിലാവും. അതിനാൽ തന്നെ വാട്സ്ആപ്പ് അക്കൗണ്ടുകൾ ഹാക്ക് ചെയ്യപ്പെടാതെ സുരക്ഷിതമായിരിക്കുക ഉപയോക്താക്കളെ സംബന്ധിച്ച് വളരെ പ്രധാനമാണ്. നിങ്ങളുടെ വാട്‌സ്ആപ്പ് അക്കൗണ്ട് ഹാക്ക് ചെയ്യപ്പെട്ടാൽ അക്കാര്യം എങ്ങനെ ചെറിയ സൂചനകളിലൂടെ മനസിലാക്കാം, ഹാക്ക് ചെയ്യപ്പെട്ട അക്കൗണ്ട് എങ്ങനെ എളുപ്പത്തിൽ വീണ്ടെടുക്കാം?

വാട്‌സ്ആപ്പ് അക്കൗണ്ട് ഹാക്ക് ചെയ്യപ്പെട്ടാൽ മനസിലാക്കാനുള്ള സൂചനകൾ

1. നിങ്ങളുടെ വാട്‌സ്‌ആപ്പ് തനിയെ ലോഗൗട്ട് ചെയ്യപ്പെടും: ചിലപ്പോൾ നിങ്ങളുടെ വാട്സ്ആപ്പ് അക്കൗണ്ട് തനിയെ ലോഗൗട്ടായിട്ടുണ്ടാകും. അല്ലെങ്കിൽ, 'ഈ നമ്പറിൽ വാട്‌സ്‌ആപ്പ് ലഭ്യമല്ല' എന്ന മുന്നറിയിപ്പാവും എഴുതിക്കാണിക്കുക. മറ്റൊരു ഡിവൈസിൽ വേറാരെങ്കിലും നിങ്ങളുടെ വാട്സ്ആപ്പ് ലോഗിൻ ചെയ്തിട്ടോ ഉണ്ടാവാം.

2. നിങ്ങൾ അയക്കാത്ത മെസേജുകളും ചാറ്റ്ബോക്സിൽ കാണിക്കാം: നിങ്ങളുടെ നമ്പറിൽ നിന്ന് വാട്‌സ്ആപ്പ് സന്ദേശം ലഭിച്ചതായി സുഹൃത്തുക്കളും കുടുംബാംഗങ്ങളും പറയുമെങ്കിലും അങ്ങനെയൊരു മെസേജും നിങ്ങൾ യഥാർഥത്തിൽ അയച്ചിട്ടുണ്ടാവില്ല.

3. വാട്‌സ്ആപ്പ് ലിങ്ക് ചെയ്‌ത അൺനോൺ ഡിവൈസ് കാണിക്കും: വാട്‌സ്ആപ്പിലെ സെറ്റിംഗ് തുറന്നാൽ ലിങ്ക്‌ഡ് ഡിവൈസ് എന്നൊരു ഓപ്ഷൻ കാണാം. അതിൽ നിങ്ങൾക്ക് അപരിചിതമായ ഡിവൈസുകളോ ബ്രൗസറുകളോ ലൊക്കേഷനുകളോ കണ്ടാൽ നിങ്ങളുടെ വാട്‌സ്ആപ്പ് അക്കൗണ്ട് അപകടത്തിലാണെന്ന് സംശയിക്കാം.

4. ഫോണിലെ ബാറ്ററി പെട്ടെന്ന് തീരുന്നു, ഫോൺ പെട്ടെന്ന് ചൂടാവുന്നു

സ്പൈവെയറുകളോ മാൽവെയറുകളോ ഉപയോഗിച്ച് നിങ്ങളുടെ ഫോണിൽ ആരെങ്കിലും പ്രവേശിച്ചാലോ ആപ്പുകൾ പ്രവർത്തിപ്പിച്ചാലോ ഫോൺ അസ്വാഭാവികമായി ചൂടാവുകയും ബാറ്ററി പെട്ടെന്ന് തീർന്നുപോവുകയുമൊക്കെ ചെയ്യാം. ഫോണിൽ എന്തോ ബാക്ക്ഗ്രൗണ്ട് പ്രവർത്തനം നടക്കുന്നുണ്ട് എന്നാണ് ഇതിനർഥം.

5. പുതിയ കോൺടാക്റ്റുകളും ഗ്രൂപ്പുകളും ഓട്ടോമാറ്റിക്കായി ആഡ് ആയിട്ടുണ്ടോ?

സംശയാസ്പദമായ കോൺടാക്റ്റുകളും ബ്രോഡ്കാസ്റ്റ് ലിസ്റ്റുകളും ഗ്രൂപ്പുകളും വാട്സ്ആപ്പിൽ അപ്രതീക്ഷിതമായി പ്രത്യക്ഷപ്പെട്ടിട്ടുണ്ടെങ്കിൽ ഉറപ്പിക്കാം നിങ്ങളുടെ വാട്‌സ്ആപ്പ് അക്കൗണ്ട് മറ്റാരോ ഉപയോഗിക്കുന്നുണ്ടെന്ന്. ഇതൊരു സ്കാം തട്ടിപ്പാകാം.

വാട്‌സ്ആപ്പ് എങ്ങനെ സുരക്ഷിതമാക്കാം?

1. ടു-സ്റ്റെപ് വെരിഫിക്കേഷൻ എനാബിൾ ചെയ്യുക

2. ഇടയ്ക്കിടയ്ക്ക് എല്ലാ ഡിവൈസുകളിൽ നിന്നും വാട്‌സ്ആപ്പ് ലോഗ്‌ ഔട്ട് ചെയ്യുക.

3.നിങ്ങളുടെ വാട്‌സ്‌ആപ്പ് അക്കൗണ്ടിൽ എന്തെങ്കിലും പ്രശ്‌നം തോന്നിയാൽ ആപ്പ് റീഇൻസ്റ്റാൾ ചെയ്യുക. വീണ്ടും ഫോൺ നമ്പർ ഉപയോഗിച്ച് വെരിഫൈ ചെയ്ത‌് അക്കൗണ്ട് പുനഃസ്ഥാപിക്കുക.

4. സുരക്ഷാ പഴുതുകൾ ഒഴിവാക്കാൻ ഇടയ്ക്കിടയ്ക്ക് ഫോണും വാട്‌സ്ആപ്പും അപ്ഡേറ്റ് ചെയ്യുക

5. പരിചയമില്ലാത്ത ആപ്ലിക്കേഷനുകൾ ഫോണിൽ സൂക്ഷിക്കരുത്. എപ്പോഴും മാൽവെയർ സ്‌കാനിംഗുകൾ നടത്തുക. വിശ്വസനീയമായ ആൻ്റിവൈറസുകൾ ഉപയോഗിക്കുക.

6. ഒരിക്കലും വാട്‌സ്ആപ്പ് ഒടിപി ആരുമായി പങ്കുവെക്കാതിരിക്കാൻ ശ്രദ്ധിക്കേണ്ടതും പ്രധാനപ്പെട്ടതാണ്. കോളിലൂടെയും മെസേജുകളിലൂടെയും ലിങ്കുകൾ വഴിയും വാട്‌സ്ആപ്പ് ഹാക്കർമാർ നിങ്ങളെ സമീപിക്കാം എന്നോർക്കുക.