താമരശ്ശേരി ചുരത്തിൽ പഞ്ചസാര ലോറി തോട്ടിലേക്ക് മറിഞ്ഞു, ഡ്രൈവറും ക്ലീനറും പരിക്കേൽക്കാതെ രക്ഷപ്പെട്ടു

താമരശ്ശേരി ചുരത്തിലെ ഒന്നാം വളവിന് സമീപം ലോറി നിയന്ത്രണം വിട്ട് തോട്ടിലേക്ക് മറിഞ്ഞു. കർണാടകയിൽ നിന്ന് കോഴിക്കോട്ടേക്ക് പഞ്ചസാര കയറ്റിവന്ന ലോറിയാണ് ചുരത്തിൽ തലകീഴായി മറിഞ്ഞത്. രാവിലെ ഒമ്പത് മണിയോടെയായിരുന്നു സംഭവം.

നൂറ് മീറ്ററോളം താഴ്ച്ചയിലേക്കാണ് ലോറി പതിച്ചത്. വണ്ടിയിലുണ്ടായിരുന്ന ഡ്രൈവറും ക്ലീനറും പരിക്കുകളില്ലാതെ രക്ഷപെട്ടു. ലോറിയുടെ ബ്രേക്ക് നഷ്‌ടപ്പെട്ടതാണ് അപകടത്തിന് കാരണമെന്നാണ് പ്രാഥമിക നിഗമനം. താമരശ്ശേരി പോലീസും വോളൻ്റിയർമാരും ചേർന്നാണ് രക്ഷാപ്രവർത്തനം നടത്തിയത്.