നവീകരിച്ച അച്ചനമ്പലം-കൂരിയാട് റോഡ് മന്ത്രി പി.എ. മുഹമ്മദ് റിയാസ് നാടിന് സമർപ്പിച്ചു

​വേങ്ങര : ​9 കോടി രൂപ ചെലവഴിച്ച് നവീകരിച്ച അച്ചനമ്പലം-കൂരിയാട് റോഡ് പൊതുമരാമത്ത്-വിനോദസഞ്ചാര വകുപ്പ് മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്തു.

​ചടങ്ങിൽ പി.കെ. കുഞ്ഞാലിക്കുട്ടി എം.എൽ.എ. അധ്യക്ഷത വഹിച്ചു. 2021-ൽ സർക്കാർ അധികാരത്തിലെത്തിയപ്പോൾ 50 ശതമാനം റോഡുകൾ റബ്ബറൈസ് ചെയ്യണമെന്ന് ലക്ഷ്യമിട്ടിരുന്നുവെന്നും, എന്നാൽ നാലര വർഷം കൊണ്ട് തന്നെ ഈ ലക്ഷ്യം കൈവരിച്ചതായും മന്ത്രി മുഹമ്മദ് റിയാസ് പറഞ്ഞു. റോഡുകളുടെ നവീകരണത്തിനായി ക്രിയാത്മകമായ നിർദ്ദേശങ്ങൾ സ്വീകരിക്കുമെന്നും മന്ത്രി കൂട്ടിച്ചേർത്തു.

​മണ്ഡലത്തിലെ മുഴുവൻ റോഡുകളും റബ്ബറൈസ് ചെയ്തതായി എം.എൽ.എ. പി.കെ. കുഞ്ഞാലിക്കുട്ടി അഭിപ്രായപ്പെട്ടു. റോഡിൻ്റെ ഉദ്ഘാടന ചടങ്ങിൽ വെച്ച് കൊളപ്പുറം മേൽപ്പാലത്തിൻ്റെ നിർമ്മാണത്തിനായുള്ള നിവേദനവും മന്ത്രിക്ക് സമർപ്പിച്ചു.

​മലപ്പുറം ജില്ലാ പഞ്ചായത്ത് പ്രസിഡൻ്റ് എം.കെ. റഫീഖ, വേങ്ങര ബ്ലോക്ക് പഞ്ചായത്ത് പ്രസിഡൻ്റ് ബെൻസീറ ടീച്ചർ, വേങ്ങര ഗ്രാമപഞ്ചായത്ത് പ്രസിഡൻ്റ് കെ.പി. ഹസീന ഫസൽ, വേങ്ങര ബ്ലോക്ക് പഞ്ചായത്ത് വൈസ് പ്രസിഡൻ്റ് പുളിക്കൽ അബൂബക്കർ മാസ്റ്റർ, വേങ്ങര ഗ്രാമപഞ്ചായത്ത് വൈസ് പ്രസിഡൻ്റ് ടി.കെ. കുഞ്ഞിമുഹമ്മദ്, അസി. എൻജിനീയർ റീത്തു എന്നിവർ ചടങ്ങിൽ സംസാരിച്ചു. വിവിധ രാഷ്ട്രീയ പാർട്ടികളുടെ നേതാക്കൾ, ജനപ്രതിനിധികൾ, ഉദ്യോഗസ്ഥർ എന്നിവരും ചടങ്ങിൽ പങ്കെടുത്തു.