ഓണത്തിന് ഇരട്ടി മധുരം! തൊഴിലാളികൾക്ക് ബോണസും ആനുകൂല്യങ്ങളും നേരത്തെ നൽകാൻ തീരുമാനം

  തിരുവനന്തപുരം : ഇത്തവണത്തെ ഓണം ആഘോഷിക്കാൻ തൊഴിലാളികൾക്ക് സന്തോഷവാർത്ത. ബോണസും മറ്റ് ആനുകൂല്യങ്ങളും ഓണത്തിന് മുമ്പ് വിതരണം ചെയ്യുമെന്ന് തൊഴിൽ വകുപ്പ് മന്ത്രി വി. ശിവൻകുട്ടി അറിയിച്ചു. മന്ത്രിയുടെ അധ്യക്ഷതയിൽ ചേർന്ന ട്രേഡ് യൂണിയൻ നേതാക്കളുടെ യോഗത്തിലാണ് ഈ സുപ്രധാന തീരുമാനം ഉണ്ടായത്. പൊതുമേഖലാ സ്ഥാപനങ്ങളിലെ ജീവനക്കാർക്കുള്ള ബോണസ് മാർഗ്ഗനിർദ്ദേശങ്ങൾ ഉടൻ പുറത്തിറക്കും. നിലവിൽ, ഈ ഫയൽ ധനകാര്യ വകുപ്പിന്റെ പരിഗണനയിലാണ്.

കയർ, കശുവണ്ടി തുടങ്ങിയ പരമ്പരാഗത മേഖലകളിലെ തൊഴിലാളികൾക്കുള്ള ബോണസ് വേഗത്തിൽ തീരുമാനിക്കുന്നതിനായി അതത് വ്യവസായ ബന്ധ സമിതികളുടെ യോഗം അടിയന്തരമായി വിളിച്ചുചേർക്കാൻ ലേബർ കമ്മീഷണർക്ക് നിർദ്ദേശം നൽകിയിട്ടുണ്ട്.

ബോണസ് വിതരണവുമായി ബന്ധപ്പെട്ട് ഉണ്ടാകാൻ സാധ്യതയുള്ള തർക്കങ്ങൾ പരിഹരിക്കാൻ തൊഴിൽ വകുപ്പ് കർശനമായ മാർഗ്ഗനിർദ്ദേശങ്ങൾ പുറത്തിറക്കിയിട്ടുണ്ട്:

ബോണസ് ആക്ട് ബാധകമായ എല്ലാ സ്ഥാപനങ്ങളിലെയും തൊഴിലാളികൾക്ക് അർഹമായ ബോണസ് ലഭിക്കുന്നുണ്ടെന്ന് ജില്ലാ ലേബർ ഓഫീസർമാർ ഉറപ്പാക്കണം.

തർക്കങ്ങൾ ഉയർന്നുവന്നാൽ അത് പരിഹരിക്കാൻ അടിയന്തരമായി ചർച്ചകൾ സംഘടിപ്പിക്കണം.

ജില്ലാ ലേബർ ഓഫീസർ തലത്തിൽ പരമാവധി മൂന്ന് ചർച്ചകൾ രണ്ട് ദിവസത്തെ ഇടവേളകളിൽ നടത്തി പ്രശ്നങ്ങൾ പരിഹരിക്കണം.

ജില്ലാ തലത്തിൽ പരിഹരിക്കാൻ കഴിയാത്ത കേസുകൾ റീജിയണൽ ലേബർ കമ്മീഷണർക്കും, അവിടെയും പരിഹരിക്കാൻ കഴിയാത്തവ ലേബർ കമ്മീഷണർക്കും കൈമാറണം.

എല്ലാ നടപടികളും ലേബർ കമ്മീഷണറേറ്റിലെ ഡാറ്റാബേസിൽ അപ്‌ലോഡ് ചെയ്യണം.

മറ്റ് ആനുകൂല്യങ്ങളും ഓണത്തിന് മുമ്പ്

ബോണസിന് പുറമെ, തൊഴിലാളികൾക്ക് ഈ ഓണക്കാലത്ത് ലഭിക്കേണ്ട മറ്റ് ആനുകൂല്യങ്ങളും ഉറപ്പാക്കാൻ തൊഴിൽ വകുപ്പ് നടപടികൾ സ്വീകരിച്ചിട്ടുണ്ട്. ഇതിന്റെ ഭാഗമായി, പൂട്ടിക്കിടക്കുന്ന സ്ഥാപനങ്ങളിലെ തൊഴിലാളികൾക്ക് ലഭിക്കേണ്ട എക്‌സ് ഗ്രേഷ്യ, പരമ്പരാഗത മേഖലകളിലെ തൊഴിലാളികൾക്കുള്ള ഇൻകം സപ്പോർട്ട് സ്കീം തുടങ്ങിയ ആനുകൂല്യങ്ങൾക്കുള്ള ഫയലുകൾ ധനകാര്യ വകുപ്പിന് കൈമാറി.

പൂട്ടിക്കിടക്കുന്ന കശുവണ്ടി ഫാക്ടറി തൊഴിലാളികൾക്കുള്ള 2000 രൂപയുടെ എക്‌സ് ഗ്രേഷ്യയും 10 കിലോ അരി വിതരണവും സംബന്ധിച്ച ഫയലുകളും ധനകാര്യ വകുപ്പിന്റെ പരിഗണനയിലാണ്.

പൂട്ടിക്കിടക്കുന്ന കമ്പനികളിലെയും എസ്റ്റേറ്റുകളിലെയും തൊഴിലാളികൾക്ക് 2000 രൂപ വീതം നൽകുന്നതിനും തോട്ടം തൊഴിലാളികൾക്ക് ഓണക്കിറ്റ് നൽകുന്നതിനുമുള്ള ഫയലുകളും ധനകാര്യ വകുപ്പിന് കൈമാറിയിട്ടുണ്ട്.

ഈ ആനുകൂല്യങ്ങളെല്ലാം ഓണത്തിന് മുൻപ് തൊഴിലാളികളിലേക്ക് എത്താൻ ആവശ്യമായ തുടർനടപടികൾ സ്വീകരിക്കാൻ തൊഴിൽ വകുപ്പ് സെക്രട്ടറിക്ക് നിർദ്ദേശം നൽകിയിട്ടുണ്ട്. ഈ ഓണക്കാലത്ത് തൊഴിൽ തർക്കങ്ങൾ പരമാവധി ഒഴിവാക്കി സൗഹാർദ്ദപരമായ അന്തരീക്ഷം നിലനിർത്താൻ ട്രേഡ് യൂണിയനുകളുടെ പൂർണ്ണ സഹകരണം മന്ത്രി അഭ്യർത്ഥിച്ചു.

യോഗത്തിൽ ട്രേഡ് യൂണിയൻ നേതാക്കളായ എളമരം കരീം, ടി.പി. രാമകൃഷ്ണൻ, ആർ. ചന്ദ്രശേഖരൻ, ബാബു ദിവാകരൻ തുടങ്ങി നിരവധി പ്രമുഖർ പങ്കെടുത്തു. കൂടാതെ, തൊഴിൽ വകുപ്പിലെ ഉന്നത ഉദ്യോഗസ്ഥരും യോഗത്തിൽ സന്നിഹിതരായിരുന്നു.