വീണ്ടും കാട്ടാനക്കലി; ആദിവാസി മധ്യവയസ്‌കന് ദാരുണാന്ത്യം

  നിലമ്പൂര്‍ | നിലമ്പൂരിൽ കാട്ടാന ആക്രമണത്തിൽ ആദിവാസി യുവാവിന് ദാരുണാന്ത്യം. മുണ്ടേരി വാണിയമ്പുഴ ഊരിലെ ബില്ലി (49) യെയാണ് കാട്ടാന ആക്രമിച്ചത്.  താൽക്കാലികമായി കുടിൽ കെട്ടി താമസിക്കുന്ന സ്ഥലത്ത് നിന്ന് 100 മീറ്റർ അകലെ വച്ചാണ് ബില്ലിയ്ക്കു നേരെ കാട്ടാനയുടെ ആക്രമണമുണ്ടായത്.

രാവിലെ 11 മണിക്ക് കൂൺ ശേഖരിക്കാൻ പോയ ബില്ലിയെ കാണാതായതിനെ തുടർന്ന് വീട്ടുകാർ തിരച്ചിൽ നടത്തിയപ്പോഴാണ് വനപാതയോട് ചേർന്ന് മൃതദേഹം കണ്ടെത്തിയത്. കഴിഞ്ഞ 2 ദിവസമായി ഇവരുടെ ഷെഡിന് സമീപം വന്ന് കൊമ്പൻ ഭീതി പരത്തിയിരുന്നു. ഈ കൊമ്പൻ തന്നെയാണ് ആക്രമിച്ചതെന്നാണ് കരുതുന്നത്.  നെഞ്ചിനും കാലിനുമാണ് ബില്ലിക്ക് പരുക്കേറ്റത്. 

മുതദേഹം നിലമ്പൂർ ജില്ലാ ആശുപത്രിയിലെത്തിക്കുന്നതിന് ചാലിയാർ കടക്കാൻ അഗ്നി രക്ഷാ സേന റബർ സിങ്കിയുമായെത്തിയിട്ടുണ്ട്. 6 മാസം മുൻപ് വാണിയമ്പുഴയ്ക് മുകളിൽ കുമ്പളപ്പാറ ഊരിലെ ആദിവാസിയെ കാട്ടാന ആക്രമിച്ച് കൊന്നിരുന്നു. 2 മാസം മുൻപ്  മൂത്തേടം ഉച്ചക്കുളം ഊരിലെ സരോജിനിയും കാട്ടാനയുടെ ആക്രമണത്തിൽ കൊല്ലപ്പെട്ടിരുന്നു.