മലപ്പുറം: കരിപ്പൂരില്‍ വീണ്ടും സ്വര്‍ണവേട്ട. പിടികൂടിയത് 1.5 കോടിയുടെ സ്വര്‍ണം. തുടര്‍ച്ചയായി സ്വര്‍ണം പിടികൂടുന്നത് മിക്സിക്കുള്ളില് നിന്നാണെന്ന് കസ്റ്റംസ് അധികൃതര്‍ പറഞ്ഞു. കരിപ്പൂര്‍ വിമാനത്താവളത്തില്‍ ഇന്നു രാവിലെ ദുബായില്‍ നിന്നും എത്തിയ ഇന്‍ഡിഗോ വിമാനത്തില്‍ രണ്ടു വ്യക്തികളില്‍ നിന്നായി മൂന്നു കിലോ സ്വര്‍ണം കോഴിക്കോട് കസ്റ്റംസ് പ്രിവന്‍റീവ് വിഭാഗം പിടിച്ചെടുത്തത്. ഏകദേശം 1.5 കോടി വിലവരുന്ന സ്വര്‍ണമാണ് പിടിച്ചെടുത്തത്. രഹസ്യ വിവരത്തിന്‍റെ അടിസ്ഥാനത്തില്‍ നടത്തിയ പരിശോധനയില്‍ മലപ്പുറം സ്വദേശിയായ ഫഹദ് എന്ന വ്യക്തിയില്‍ നിന്നും 1168 ഗ്രാം സ്വര്‍ണ മിശ്രിതവും കണ്ണൂര്‍ സ്വദേശിയായ റമീസ് എന്ന വ്യക്തിയില്‍ നിന്നും മിക്‌സിയില്‍ ഒളിപ്പിച്ച നിലയില്‍ 1.86 കിലോ സ്വര്‍ണവും ആണ് കണ്ടെടുത്തത്. രണ്ടു പേരെയും കസ്റ്റംസ് അറസ്റ്റ് ചെയ്യുകയും പിന്നീട് ജാമ്യത്തില്‍ വിട്ടയക്കുകയും ചെയ്തു.
കള്ളക്കടത്ത് സംബന്ധിച്ച്‌ കസ്റ്റംസ് അന്വേഷണവും തുടര്‍നടപടികളും പുരോഗമിക്കുകയാണ്. മിക്‌സിയുടെ മോട്ടോറിനുള്ളിലായി ഉരുക്കി ഒഴിച്ച നിലയിലായിരുന്നു സ്വര്‍ണം. ഇത്തരത്തില്‍ ഒരാഴ്ച്ചക്കകം കസ്റ്റംസ് മിക്‌സിയില്‍ ഒളിപ്പിച്ച നിലയില്‍ മാത്രം നാലര കിലോയിലധികം സ്വര്‍ണം പിടിച്ചെടുക്കുകയുണ്ടായി. എയര്‍ കസ്റ്റംസ് വിഭാഗവും ഇത്തരത്തില്‍ ദിവസേനയെന്നോണം സ്വര്‍ണം പിടിക്കുന്നുണ്ട്. അടുത്തിടെ സ്വര്‍ണത്തിന്റെ ഇറക്കുമതി നികുതിയിലുണ്ടായ വര്‍ധന കള്ളക്കടത്തിന്റെ ലാഭം വര്‍ധിച്ച സാഹചര്യത്തിലായിരുന്നു പ്രത്യേക പരിശോധന നടത്തിയത്. അസിസ്റ്റന്റ് കമ്മീഷണര്‍ ശ്രീ സിനോയ് കെ മാത്യു വിന്റെ നേതൃത്വത്തില്‍ സൂപ്രണ്ടുമാരായ ശ്രീ പ്രകാശ് എം, ശ്രീ പ്രവീണ്‍ കുമാര്‍ കെ കെ, ശ്രീ സലില്‍, ശ്രീ ബഷീര്‍ അഹമ്മദ് ഇന്‍സ്‌പെക്ടര്‍ മാരായ ശ്രീ കപില്‍ദേവ് സുരീര, ശ്രീ മുഹമ്മദ് ഫൈസല്‍, ശ്രീ പ്രതീഷ് എം, ഹവില്‍ദാര്‍ ശ്രീ സന്തോഷ് കുമാര്‍ എം എന്നിവരടങ്ങിയ സംഘമാണ് പരിശോധനയില്‍ പങ്കെടുത്തത്.
അതേ സമയം കരിപ്പൂര്‍ വിമാനത്തവളത്തില്‍ കസ്റ്റംസിനെ വെട്ടിച്ച്‌ വിദേശത്ത് നിന്നും കടത്തിയ 88 ലക്ഷം രൂപ വില വരുന്ന 1.783 കിലോ സ്വര്‍ണം ഇന്നലെ രാത്രി പോലീസ് പിടികൂടിയിരുന്നു. താനാളൂര്‍ സ്വദേശി നിസാമുദ്ദീന്‍ മിക്സിക്കുള്ളില് ഒളിപ്പിച്ച സ്വര്‍ണം കസ്റ്റംസ് പരിശോധനയില്‍ നിന്നും രക്ഷപ്പെട്ട് പുറത്തെത്തിച്ചിരുന്നു. എന്നാല്‍ രഹസ്യവിവരത്തെ തുടര്‍ന്നു പുറത്തുണ്ടായിരുന്ന പോലീസ് ലഗേജ് തുറന്ന് പരിശോധിച്ചതോടെ മിക്‌സിയുടെ മോട്ടോറിനുള്ളിലെ ആര്‍മേച്ചര്‍ കോയിലിനകത്തെ മാഗ്‌നറ്റ് എടുത്ത് മാറ്റി പകരം അതിനുള്ളില്‍ അതിവിദഗ്ദമായി ഒളിപ്പിച്ച നിലയില്‍ സ്വര്‍ണ്ണം കണ്ടെത്തുകയായിരുന്നു.
Post a Comment
Thanks