കോഴിക്കോട് : കൊവിഡ് സ്ഥിരീകരിച്ച് ചികിത്സയിലായിരുന്ന രണ്ടുപേര്‍ കോഴിക്കോട് ഗവ. മെഡിക്കല്‍ കോളേജ് ആശുപത്രിയില്‍ മരിച്ചു. വടകര പുതുപ്പണം വട്ടക്കണ്ടിയില്‍ മോഹനന് (67), ഫറോക്ക് സ്വദേശിനി രാജലക്ഷ്മി (62) എന്നിവരാണ് ഇന്ന് മരിച്ചത്. പ്രമേഹബാധിതനായിരുന്ന മോഹനന് ഹൃദ്രോഗവും വൃക്കരോഗവും ഉണ്ടായിരുന്നു.
സ്വകാര്യ ആശുപത്രിയില്‍ നടത്തിയ പരിശോധനയിലാണ് കൊവിഡ് രോഗബാധ കണ്ടെത്തിയത്. തുടര്‍ന്ന് മെഡിക്കല്‍ കോളേജ് ആശുപത്രിയിലെത്തിച്ചു. ഇവിടെയെത്തുമ്പോള്‍ തന്നെ ആരോഗ്യനില മോശമായിരുന്നുവെന്നാണ് അധികൃതര്‍ പറയുന്നത്. മോഹനന്റെ മരണം സ്ഥിരീകരിച്ചതോടെ വടകര മുനിസിപ്പാലിറ്റിയിലെ ചീനംവീട് വാര്‍ഡില്‍ പ്രതിരോധ നടപടികള്‍ ഊര്‍ജിതമാക്കിയിട്ടുണ്ട്.
ഫറോക്ക് സ്വദേശിനി രാജലക്ഷ്മിയുടെ രോഗ ഉറവിടം സംബന്ധിച്ച് വ്യക്തതയില്ല. മകന്റെ ചികിത്സയുമായി ബന്ധപ്പെട്ട് ചില ആശുപത്രികളില്‍ ഇവര്‍ പോയിരുന്നുവെന്നാണ് വിവരം. ഇവരുടെ ബന്ധുക്കളോട് നിരീക്ഷണത്തില്‍ പോകാന്‍ നിര്‍ദേശിച്ചിട്ടുണ്ട്. ഇരുവരുടെയും സംസ്‌കാരം കൊവിഡ് മാനദണ്ഡങ്ങള്‍ പാലിച്ചുനടത്തുമെന്ന് അധികൃതര്‍ അറിയിച്ചു.
Post a Comment
Thanks