തിരൂരങ്ങാടി: സംസ്ഥാനത്തെ മോട്ടോർ വാഹന വകുപ്പിനെ പിടിച്ചുലച്ച വ്യാജ ലൈസൻസ് തട്ടിപ്പ് കേസിൽ തിരൂരങ്ങാടി സബ് ആർ.ടി.ഒ ഓഫീസിലെ ഒരു ഉദ്യോഗസ്ഥനെ കൂടി സസ്പെൻഡ് ചെയ്തു. മോട്ടോർ വെഹിക്കിൾ ഇൻസ്പെക്ടർ (MVI) സി.ബിജുവിനെതിരെയാണ് ഏറ്റവും ഒടുവിൽ നടപടിയുണ്ടായിരിക്കുന്നത്.ഇതോടെ ഈ കേസുമായി ബന്ധപ്പെട്ട് തിരൂരങ്ങാടി ആർ.ടി.ഒ ഓഫീസിലെ രണ്ട് എം.വി.ഐമാരും ഒരു ക്ലർക്കും സസ്പെൻഷനിലായി. നേരത്തെ എം.വി.ഐ ജോർജ്, ക്ലർക്ക് നജീബ് എന്നിവരെ സസ്പെൻഡ് ചെയ്തിരുന്നു.
ഉദ്യോഗസ്ഥരുടെ ഒത്താശയോടെ സംസ്ഥാനത്ത് വ്യാപകമായ ഡ്രൈവിംഗ് ലൈസൻസ് തട്ടിപ്പ് നടക്കുന്നുവെന്ന കണ്ടെത്തലിനെ തുടർന്നാണ് ഗതാഗത വകുപ്പിന്റെ ഈ നിർണ്ണായക നീക്കം. മൈസൂരിലെ ഡ്രൈവിംഗ് ലൈസൻസുകൾ സംഘടിപ്പിച്ച് അതിലെ മേൽവിലാസവും ഒപ്പും ഫോട്ടോയും മാറ്റിയ ശേഷം കേരളത്തിലെ ഒറിജിനൽ ലൈസൻസ് ആക്കി മാറ്റുന്ന വൻ റാക്കറ്റാണ് ഇതിന് പിന്നിൽ പ്രവർത്തിക്കുന്നത്.
മോട്ടോർ വാഹന വകുപ്പിലെ ഉദ്യോഗസ്ഥർ ഈ അനധികൃത മാറ്റങ്ങൾക്ക് കൂട്ടുനിൽക്കുന്നുവെന്ന ഗുരുതരമായ വിവരമാണ് പുറത്തുവന്നിട്ടുള്ളത്. തട്ടിപ്പ് ശ്രദ്ധയിൽപ്പെട്ടതിനെ തുടർന്ന് മോട്ടോർ വാഹന വകുപ്പിന്റെ വിജിലൻസ് വിഭാഗം വിശദമായ അന്വേഷണം ആരംഭിച്ചിരുന്നു. വിജിലൻസ് റിപ്പോർട്ടിന്റെ അടിസ്ഥാനത്തിലാണ് ഇപ്പോൾ ഉദ്യോഗസ്ഥർക്കെതിരെ കൂട്ട നടപടി സ്വീകരിച്ചിരിക്കുന്നത്.
സംസ്ഥാനത്തെ മറ്റ് ആർ.ടി.ഒ ഓഫീസുകളിലേക്കും ഈ തട്ടിപ്പിന്റെ ശൃംഖല വ്യാപിച്ചിട്ടുണ്ടോ എന്ന് വിജിലൻസ് പരിശോധിക്കുന്നുണ്ട്. അനധികൃതമായി ലൈസൻസ് നേടിയവരുടെ വിവരങ്ങൾ ശേഖരിക്കാനും അവ റദ്ദാക്കാനുമുള്ള നടപടികളും ഇതിനോടൊപ്പം പുരോഗമിക്കുന്നുണ്ട്.
വരും ദിവസങ്ങളിൽ കൂടുതൽ ഉദ്യോഗസ്ഥർക്കെതിരെ നടപടിയുണ്ടാകുമെന്നാണ് ലഭിക്കുന്ന സൂചന. വകുപ്പിലെ അഴിമതി തുടച്ചുനീക്കുന്നതിന്റെ ഭാഗമായി ഓൺലൈൻ സംവിധാനങ്ങളിൽ കൂടുതൽ സുരക്ഷാ ക്രമീകരണങ്ങൾ ഏർപ്പെടുത്താനും സർക്കാർ ആലോചിക്കുന്നുണ്ട്.
റിപ്പോർട്ട്:
അഷ്റഫ് കളത്തിങ്ങൽ പാറ
إرسال تعليق
Thanks