പ്രാര്‍ഥനയോടെ നാട്, ജുറൈജിനെ നാലു ദിവസം പിന്നിടുമ്പോഴും കണ്ടെത്താനായില്ല; തിരച്ചിലിന് ഇന്ന് കൊച്ചിയിൽ നിന്നും നേവിയെത്തും

പരപ്പനങ്ങാടി: കഴിഞ്ഞ ബുധനാഴ്ച പാലത്തിങ്ങൽ പുഴയിൽ കൂട്ടുകാരോടുത്ത്

കുളിക്കാനിറങ്ങിയപ്പോൾ ഒഴുക്കിൽപെട്ട് കാണാതായ 17 കാരനെ കണ്ടത്താൻ കൊച്ചിയിൽ നിന്ന് നാവിക സംഘമെത്തുന്നു.

താനൂർ എടക്കടപ്പുറം സ്വദേശി കമ്മാക്കൻ്റെ പുരക്കൽ ഷാജഹാൻ്റെ മകൻ ജുറൈജ് (17) ആണ് കഴിഞ്ഞ ബുധനാഴ്ച കടലുണ്ടി പുഴയിൽ ന്യൂ കട്ടിൽ കാണാതായത്.

നാല് ദിവസമായി വിവിധ സംഘങ്ങൾ ഊർജ്ജിതമായ തിരച്ചിൽ നടത്തുന്നുണ്ടെങ്കിലും കുട്ടിയെ ഇതുവരെ കണ്ടത്താൻ കഴിഞ്ഞിട്ടില്ല.

ഇതിനെ തുടർന്ന് താനൂർ മുൻസിപ്പൽ ചെയർമാൻ റഷീദ് മോര്യ,പരപ്പനങ്ങാടി മുൻസിപ്പൽ ചെയർമാൻ ഷാഹുൽ ഹമീദ് എന്നിവർ സംയുക്തമായി മലപ്പുറം ജില്ല കലക്ടറെ സമീപിച്ച് തെരച്ചിൽ ഊർജ്ജിതപെടുത്താൻ അഭ്യർത്ഥിച്ചതിനെ തുടർന്നാണ് നേവി സംഘം എത്തുന്നത്.

ഇന്ന് രാവിലെ 9 മണിയോടെ കൊച്ചിയിൽ നിന്ന് എത്തുന്ന നാവിക സേന സംഘവും, ഇപ്പോൾ തിരച്ചിൽ നടത്തി കൊണ്ടിരിക്കുന്ന സംഘത്തെയും ഏകോപിപ്പിച്ചാണ് തെരച്ചിൽ ഊർജിതപെടുത്തുന്നത്.

ഇതിനായി ഒഴുക്കിൻ്റെ ശക്തി കുറക്കാനായി വിവിധ പുഴയിലെ ചീർപ്പുകളും താഴ്ത്തിയിട്ടുണ്ട്.

ഇന്ന് അഞ്ചാം ദിവസത്തിലേക്ക് കടക്കുന്ന തിരച്ചിലിൽ പ്രതീക്ഷ അർപ്പിച്ചിരിക്കുകയാണ് ബന്ധുക്കളും നാട്ടുകാരും.